കുടുംബത്തിന്റെ ശ്രീ

കുറച്ചു കാലങ്ങളായി വിഡ്ഢിപ്പെട്ടിയുടെ മുന്നില് ചിലവഴിക്കുന്ന സമയം വളരെ കുറഞ്ഞിരിക്കുന്നു. മുന്പൊക്കെ സിനിമയും മറ്റും കണ്ടിരുന്നുവെങ്കിലും ഇപ്പോള് അതൊക്കെ വിരളമായിരിക്കുന്നു. രാത്രിയിലത്തെ ഇംഗ്ലീഷ് വാര്ത്തയും അതിനു ശേഷം മലയാളം ചാനലുകളില് ഏതെങ്കിലുമൊന്നില് വരുന്ന തമാശകളുമായി ചുരുങ്ങിയിരുന്നു ടിവിയുമായുള്ള ബന്ധം. എന്നാല് ന്യൂസ് അവര് ആര്ണബ് ഗോസ്വാമിയുടെ അലറല് അവര് ആയി മാറിയപ്പോള് പ്രൈം ടൈം ന്യൂസും അവഗണിക്കാന് തുടങ്ങി. അടുക്കളയില് അന്നന്നത്തെ പണികള് അവസാനിപ്പിക്കാനുള്ള തിരക്കിനിടയിലും പാത്രങ്ങളുടെ കലപിലയ്ക്കിടയിലും ടിവിയില് നിന്നും ഉയര്ന്നു കേള്ക്കുന്ന ഉച്ചത്തിലുള്ള ശബ്ദകോലാഹലങ്ങളെ ഒരു പാട്ടിലോ അല്ലെങ്കില് എന്തെങ്കിലും ചിന്തയിലോ മുക്കിക്കളയുകയാണ് പതിവ്. പത്തു മണിക്ക് ഹിസ്റ്ററി ചാനലില് വരുന്ന പരിപാടി രസകരം എന്ന് തോന്നിയാല് കാണും. അതും നല്ല പാതിക്കൊപ്പം മാത്രം. അദ്ദേഹം സ്ഥലത്തില്ലാത്ത ദിവസങ്ങളില് വൈകുന്നേരം കുട്ടികള് കുറച്ചു നേരം ടി വി കണ്ടു കഴിഞ്ഞാല് അതിനു വിശ്രമം നല്കുകയാണ് പതിവ്. ഇന്നലെ പതിവിനു വിപരീതമായി പത്തരകഴിഞ്ഞും എന്തൊക്കെയോ തമാശകള് കണ്ടു രസിച്ചിരുന്നു. ഒ...