മാറേണ്ടത് നീ...ഞാനല്ല!
ഞാനുടുക്കും ചേലകളാണുനിന്‍
കാമത്തിന്നുദ്ദീപനമെന്നു നീയോതി;
ദേഹമൊരായിരം തുണികളില്‍
മൂടിപ്പുതച്ചു ഞാനൊളിച്ചു വച്ചു...
വഴികളില്‍ ഞാനിറങ്ങി നടക്കുന്നതാണു
നിന്നാസക്തിയേറ്റുന്നതെന്നു നീയോതി-
യന്നേരം, വീടിന്‍ ചുമരുകള്‍ക്കുള്ളില്‍
അടച്ചു ഞാനൊരു ജന്മം തീര്‍ത്തു...
എന്റെ ചിരികളാണു നിന്നെ മൃഗ-
മാക്കുന്നതെന്നു നീയോതി വീണ്ടും,
ചിരിയെന്‍ മനസ്സിന്‍ കാണാക്കയത്തി-
ന്നടിത്തട്ടില്‍ ഞാന്‍ കുഴിച്ചുമൂടി...
എന്റെ നോട്ടമാണ്‌ നീയെന്നെ ധ്വംസി-
ക്കുവാന്‍ കാരണമെന്നോതി നീ,
ഉടനെയെന്‍ കണ്ണുകളടച്ചു ഞാനെന്‍
ലോകത്തെയാകെ ഇരുട്ടിലാക്കി...
എന്റെ വാക്കുകള്‍ നിന്നെ മദോന്മത്ത-
നാക്കുന്നുവെന്നു നീയോതിയപ്പോള്‍,
ഞാനെന്‍ വായ മൂടി,യൊരു മൂളല്‍
പോലുമില്ലാതെ മൌനിയായിരുന്നു...
എന്നിട്ടിപ്പോഴെന്തേ അമ്മതന്‍ മടി-
ത്തട്ടില്‍ സ്വസ്ഥമായുറങ്ങുമൊരു
കുഞ്ഞിളം പൈതലെ നീ ഞരിച്ചമര്‍ത്തി,
നിമിഷ സുഖത്തിന്നവളെ കുരുതിയാക്കി???
അവളുടുത്ത ചേലയോ, പിച്ചവെയ്ക്കും
വഴികളോ, കളങ്കമില്ലാ ചിരികളോ,
നിര്‍മ്മലമാം നോട്ടമോ, കൊഞ്ചിമൊഴിയും
വരികളോ, നിന്നിലെ മൃഗത്തെയുണര്‍ത്തി???
അറിയുന്നു ഞാനിപ്പോള്‍, കുറ്റമെന്‍ ചേല-
യിലല്ല, ഞാന്‍ നടക്കും വഴികളോ,
എന്‍ മൊഴികളോ, ചെറു ചിരികളോ
മിഴികളോ ഒന്നുമേയല്ലെന്ന നഗ്ന സത്യം...
കുറ്റത്തിന്‍ മാറാക്കറ പുരണ്ടിരിക്കുന്നത്
സ്ത്രീയെ അമ്മയായ്, പെങ്ങളായ് മകളായ്
കാണാന്‍ കഴിയാത്ത, വികൃതമാം നിന്‍ മനസ്സി-
ലാണെന്നുള്ള ഘോര സത്യമിന്നറിക നീയും....
കാമത്തില്‍ നീലിച്ച നിന്‍ കണ്‍കള്‍ മൂടുക,
നഗ്നത തേടും മനസ്സിനെ കുഴിച്ചു മൂടുക നീ;
കാമാര്‍ത്തി പൂണ്ടു നീയൊരു മൃഗമായി-
നിയും മാറീടുമെന്നാകില്‍ അറിക ...
വഴിയിലിറങ്ങാതെ, മിണ്ടാതെ, ചിരിക്കാതെ,
ഒന്നും കാണാതിനിയിരിക്കേണ്ടത് ഞാനല്ല,
വികൃതമാം മനസ്സും പേറി, മനുഷ്യരൂപം
ധരിച്ച നീയാം രാക്ഷസന്‍ മാത്രമല്ലോ!
Comments
തിരിച്ചറിവുകള്‍ക്കു പ്രേരകം...
പിച്ചച്ചീന്തപ്പെടുന്ന സഹോദരിമാരേ,
ആണായിപ്പിറന്നതില്‍ ലജ്ജ തോന്നുന്നു...
സഹതപിക്കാനല്ലാതെ, ദുഃഖിക്കാനല്ലാതെ,
പ്രതിഷേധിക്കാനല്ലാതെ എന്തു ചെയ്യാന്‍
കഴിയുമെന്നോര്‍ത്ത് തടി തളരുന്നു, വ്യഥയേറുന്നു...! :(
അതിനു കാരണം ചികയുന്ന ചില അഭിനവ സമൂഹ്യ പരിഷ്കര്‍ത്താക്കളെ ഓര്‍ത്തും..
ശക്തമായ വരികൾ
ആശംസകൾ
ഹ ഹ ഹാ .. അത് തന്നെ സംഗതി.
കണ്ണുകളില്ലാത്ത വികാരം...
നിലവിളി കേള്‍ക്കാതെ
അടഞ്ഞു പോയ കാതുകള്‍...
കരളുരുകിയൊലിച്ച വരികള്‍ക്ക് പ്രണാമം..
ഉള്ളില്‍ നുരയുന്ന കാമം മറ നീക്കി പുറത്ത് വരും ..
ഏതു വെളിച്ചതിലും ........
" പതിനാല് പേരു പൊലും " മൂന്ന് വയസ്സുള്ള കുട്ടി ...
ചെറ്റകള്‍ക്ക് മനസ്സെന്ന് പറയുന്നതില്ലേ ...........
എല്ലാം മാഞ്ഞു പൊകും , കുറേ ഫ്ലാഷ് ന്യൂസുകള്‍ക്ക് ശേഷം ...
ആ പാവം കുട്ടി എന്ത് കാട്ടി ആണ് ഇവനെയോക്കെ
കാമഭ്രാന്തന്മാരാക്കിയത് ...........
വസ്ത്രത്തിനേയും , വാക്കുകളേയും , തലയുയര്‍ത്തി നടപ്പിനേയും
കുറ്റം പറയുന്ന സമൂഹമേ , നീ ഉത്തരം പറയണം ..?
ഉള്ളിന്റെ വേവു മുഴുവന്‍ വരികളിലുണ്ട് .............
കാതുകള്‍ പൊത്തിപ്പിടിക്കട്ടെ...
വായയടക്കാതെ നാലു തെറി പറയട്ടെ;
അവനവനാത്മസുഖത്തിനല്‍പമെങ്കിലും !
മോളേ, നീ വിളക്കായാല്‍ പോരാ,
അഗ്നിയാകണം. ജ്വലിക്കുന്ന അഗ്നി...
മന്ദമാരുതനായാല്‍ പോരാ,
ആഞ്ഞടിക്കുന്ന കൊടുങ്കാറ്റാവണം.
വജ്രസമാനമാവണം...
പൊന്നുമോളേ.. മാപ്പ് ...!
കുറച്ചു ദിവസം കഴിഞ്ഞാല്‍
അല്ലെങ്കില്‍ അടുത്ത മണിക്കൂറിനുള്ളില്‍
വിണ്ടുമീ മാപ്പുകളുടെ ഭാണ്ഡങ്ങളുമായ്
വരേണ്ടിവരും എന്നറിയാതെയല്ല.
എങ്കിലും മാപ്പ്...! മാപ്പ്.
അഭിനന്ദനങ്ങള്‍ നിഷ
ശക്തമായ വകാരം തുളുമ്പുന്ന വാക്കുകള്‍
വേട്ടക്കാരന്‍ ജീനിനെ കണ്ടുപിടിച്ച് നശിപ്പിക്കണം..... ഭ്രൂണാവസ്ഥയില്‍ തന്നെ
ഒരു സ്ത്രീയുടെ ദൈന്യത തുളുമ്പുന്ന വരികള്‍ ........
വളരെ ശക്തം . ഒരു 100 ലൈക്‌ തരുന്നു.
അറിയേണ്ടവര്‍ കേള്‍ക്കുന്നില്ല, കാണുന്നില്ല അല്ലെങ്കില്‍ അവര്‍ ഒന്നിനേയും
ഭയക്കാത്ത ഒരിടത്ത് തന്നിഷ്ടത്തോടെ മറ്റുള്ളവരുടെ സഹായത്തോടെ
മതിച്ചുരസിക്കുന്നു....
ഇതിനു ഒരു തടയിടാന്‍ പറ്റുകയുള്ളൂ -
'പുരുഷന്‍ ആണ് എന്ന് പറയുന്നതില്‍ ജാള്ല്യത തോന്നുന്നു-
ആണത്തം നഷ്ടപ്പെടുത്തുന്ന തരാം ശിക്ഷകള്‍ തന്നെ നല്‍കണം.. വെറുതെ തൂക്കിക്കൊല്ലും, ജയിലില്‍ ഇടും എന്നൊന്നും പറഞ്ഞാല്‍ ഇവര്‍ക്കുണ്ടോ ഭയം..
നപുംസകമായി നമുക്കിടയില്‍ ജീവിക്കണം.. അത് കനുന്നവരെങ്കിലും ഇനി ഈ വക ക്രൂരത ഒരു പെണ്ണിനോടും ചെയ്യരുത്..
സങ്കടം ജനിപ്പിക്കുന്ന വരികള്‍....,..
ഞാന്‍ "കുഞ്ഞു" എന്ന് വിളിയ്ക്കുന്ന എന്റെ "സിയാ"
അവളെ ഓര്‍ത്താണ് ഈ മരുഭൂമിയില്‍ പ്രവാസിയായി കഴിയുന്ന
എന്റെ ഭീതി മുഴുവന്‍.,.......
ഓരോ ദിവസവും ടെലിവിഷനിലും,പത്രത്തിലും വരുന്ന വാര്‍ത്തകള്‍
കാണുമ്പോള്‍ ഭയങ്കര അസ്വസ്ഥതയാണ് അനുഭവിയ്ക്കുന്നത്...
കവിത വായിച്ചു.
നന്നായിരിയ്ക്കുന്നു...
ആശംസകളും.. അഭിനന്ദനങ്ങളും, ഒന്നുമില്ല.
മനസ്സും, വാക്കും, വരികളും ഒക്കെ എനിയ്ക്കിപ്പോള്‍ ശൂന്യമാണ്....
ആശംസകള്‍.
ഇതേ വിഷയത്തില്‍ ഒരു പോസ്റ്റ്‌ ഞാന്‍ ഇട്ടിരുന്നു. സമയം കിട്ടിയാല്‍ ഒന്ന് വായിക്കുക.
www.anithakg.blogspot.com
ജനിതിക മാറ്റം നടത്തിയാലും ഇക്കാലത്ത് രക്ഷയുണ്ടെന്നു തോന്നുന്നില്ല..
താങ്കളുടെ മാനസികാവസ്ഥ ഒരളവുവരെയെങ്കിലും മനസ്സില്ലാക്കുന്നു... പ്രക്ഷുബ്ധമായ മനസ്സോടെയാണെങ്കിലും ഇവിടെ വന്നതിനും ഇത്രയും കുറിച്ചതിനും ഏറെ നന്ദി! കുഞ്ഞു സിയായ്ക്ക് എല്ലാ നന്മകളും നേരുന്നു...
എന്തും ഏതും മറ്റുള്ളവരുടെ കുറ്റമായി ചിത്രീകരിക്കുന്നവര്‍ക്ക് ലോകത്ത് എന്ത് നടന്നാലും വെറും ചര്‍ച്ചാവിഷയം മാത്രം. അവരെക്കുറിച്ച് ഒന്നും പറയാതിരിക്കുക തന്നെയാണ് നല്ലത്.